ದಿನಕ್ಕೊಂದು ಕವನ: (೨) ಸಂದೇಶ

ಅದೇ ಬಾನು ಅದೇ ಭೂಮಿ
ಅದೇ ಸೂರ್ಯ ಚಂದ್ರಮ
ವರುಷ ಬೇರೆ ಹರುಷ ತೋರೆ
ಅದುವೆ ಮನದ ಸಂಭ್ರಮ
ಇದೇ ತೆರದಿ ಮುಗಿದುಹೋದ
ಯುಗಗಳೆನಿತೊ ಜಗದಲಿ?
ಮುಗಿಯದಾಸೆ ಎದೆಯೊಳಿರಲು
ಸೊಗಸು ಪ್ರತೀ-ಕ್ಷಣದಲಿ

ಆದುದಾಯ್ತು ಬೇವು ಎಲ್ಲ
ಆಗುವುದನು ನೋಡುವ
ಈಗಲಾದರೂನು ಬೆಲ್ಲ
ನೀಡು ಎಂದು ಬೇಡುವ
ಬಯಕೆಯು ಬೇರೂರಿರುವುದು
ಹೃದಯ ಹೃದಯದಲ್ಲಿಯೂ
ಚಿಗುರಿ ಹೂವ ಬಿಡುತಲಿಹುದು
ಪ್ರತಿ ವಸಂತದಲ್ಲಿಯೂ

ನೆಲವು ಅದೇ ಆದರೂನು
ಕಾಲ ಬದಲು ಅಲ್ಲವೆ?
ಚಿಗುರಿ ಹೂವ ಬಿಟ್ಟ ವೃಕ್ಷ
ಫಲವ ಕೊಡುವುದಿಲ್ಲವೆ?

ಕಾಲ ಬೇಕು ಕಾಯಬೇಕು
ಕಾಣಬೇಕು ಕನಸನು
ಬಾಳಬೇಕು
ತಾಳಬೇಕು
ಬೆಲ್ಲದೊಡನೆ
ಬೇವನೂ