ದಿನಕ್ಕೊಂದು ಕವನ: (೧೬) ಒಂದು ಹಕ್ಕಿಯ ಕಥೆ

ಹಕ್ಕಿಯೊಂದು ಹಾರುತ್ತಿತ್ತು
ಹಿಂತಿರುಗಿ ನೋಡದೇ
ಮುಂದಕ್ಕೆ ಸಾಗಿತ್ತು
ಮುಂದಾಲೋಚನೆಯಿಂದ
ಮೇಲಕ್ಕೆ ಏರಿತ್ತು
ಗಿರಿಪಂಕ್ತಿಗಳೆಡೆಯಲ್ಲಿ ತೂರುತ್ತಿತ್ತು

ಹೀಗೇ ಸಾಗುತ್ತ ಅದಕ್ಕೊಮ್ಮೆ
ಹಿಂತಿರುಗಿ ನೋಡುವ ಮನಸ್ಸಾಯಿತು
ತಿರುಗಿಸಿತು ಕತ್ತು
ಹಿಂದಿದ್ದ ಹಕ್ಕಿಗಳೆಲ್ಲ ಮುಂದಕ್ಕೆ ಹೋಗಿ
ಇದು ಹಿಂದೆಬಿತ್ತು

ಹಾಗೇ ಹೋಗುತ್ತ ಇನ್ನೊಮ್ಮೆ
ದೃಷ್ಟಿ ಹರಿಸಿತು ಕೆಳಗೆ
’ಅಬ್ಬ ಭೂಮಿಯೆ!
ನಾನೆಷ್ಟು ಮೇಲೆ!’
ಅಚ್ಚರಿಪಡುತ್ತ ನಿಂತಿತು
ಒಂದು ಕ್ಷಣ ಹಾಗೇ

ಮರುಕ್ಷಣವೆ
ಧೊಪ್ಪನೆ ಬಿತ್ತು
ಭೂಮಿಯಮೇಲೆ!
ಹೆಣದ ಸುತ್ತಲು ನೆರೆದ
ಹಕ್ಕಿಗಳು ಅಂದುಕೊಂಡವು
’ಇದೆಂಥ ಲೀಲೆ!’